"Mekhanai Ngajong Janda"

Lain khusia lagi
Mekhanai ngajong janda
Mulli bela pekon ji
Lamon tegakh mit jawa

Lamon mulli lunik wi
Kidang lagi sekula
Kapan lulus kanah ni
Lapah nyambekhang juga

Mekhanai sai pekon ji
Lamon mekhanai tuha
Beni mak mansa mulli
Ulih setok ni langka

Mula mak aneh lagi
Kik tian ngajong janda
Ulih pilih mak lagi
Mak ulah-ulah dia.

Surabaya 12 Januari 2015
Karya Heri Al Kusairi.

"Ulai Wai"

Ajo kutulis kisah
Mekahani zaman tumbai
Nalom nihan bubabah
Kidang model ulai wai

Kapan ya haga luah
Kawai masup di cubrai
Punyana ni hak gagah
Gunjukh ni takai-akai

Cuping lubang kebelah
Galah putandok khattai
Anggop ni gaya kidah
Kidang kalah di babbai (mak nanjak)

Kapan lapak sesiyah
Radio ni ti kuttai
Puselok khkuk nipah
Tupung sinjang tipakai

Kak khadu mulang kanah
Cekhita ni aduhai
Otoh kuk balak babah
Bukti ni mak sesuai

Surabaya 7 januari 2015
Oleh : heri al kusairi

"SASIYAHAN"

Mepekh-mepekh jak jaoh
Liwat gelikhan lamban
Laju lapah mamedoh
Haga lapah bekhasan

Kenyin kham geluk tigoh (Sampai)
Mak dipandayi tian
Ngetok-ngetok lalegoh
Di sassai lamban papan

Sasiopan memoloh
Tan cawa setimbalan
Bunyini tilalegoh
Tiyan ngekhedok khasan.

Kapan ya kedolokhan
Semenit mak kik lupa
Badan injuk lawangan
Kik bingi mak putungga

Modal khukuk lintingan
Pagun tibidi juga
Demi togok bekhasan
Begukhau lalang waya

Kuk miyoh ni titahan
Kapan tungga asik na
Pak agas lamon nihan
Pagun mak tkhekhasa.

khisok pak kemawasan
Mulang ni subuh buta
Businjang selinggoman
Persis injuk sekura.

Kantu khanno do kawan
Lelakun zaman tumbai
Gelakh ni sesiyahan
Bekhasan liwat sassai

Surabaya 9 Desember 2014
Oleh Heri Al Kusairi.

"Ijah Tawwai"

Ku tanom pay do pakhi
Nyabuk jak pembunian
Tanda kita muakhi
Se-ijah, setawwayan

Se-ijah setawwayan
Sepenyinan di cawa
Tetepay hulun kaban
Ki menok kham celaka

Hamu awi di pekhing
Say kawokh hamu salah
Ngebattah luwah takhing
Sekiccong uyak galah

Sekiccong uyak galah
Ngaku benokh tenggalan
Mula puwakhi ngijah
Kantu jadi sesolan

Balaq batang Belimbing
Ninggam penggekh khenglaya
Hokhek dang kedol cuping
Kantu mak temon dia

Kantu mak temon dia
Mingan hukhik tenggalan
Pagun ulang lajuna
Khituk puwakhi kaban

Pakkalan di pinggikh way
Paccukhan batang biyah
Say tuha wajib nawway
Ki wat say ngukha salah

Ki wat say ngukha salah
Say Tuha, mak ngekhana
Bangik ga hulun nyukhah
Mati puas si Da'a

TABIK.
Hyogoken, 01 Oktober 2013
OLeh Hendri Semaka..

"LEHOT"

Ija niku Anak ku
Nyak cawa tengis ko pay
Penyin ko pay lehot ku
Lehot jak Tamong tumbay

Allah jengan bukilu
Asing gelak gumelay
Dang lupa di say Fardhu
Pakaimu jemoh sawai

Di niku, Nyak pengatu
Betik-betik ko guwai
Ki jak cawa, setunggu
Dang cawa lillih lubay

Dunia kasakh maju
Pilih-pilih do inday
Dang Pisang Ambon hamu
Ki sangun Putti Jelay

Injuk hani lom lagu
Belajakh ki mak kelai
Dang gawit ngukkui hulu
Butanya ki mak pandai

Tak ija pay lehot ku
Kalau dapok ni pakai
Du'a tunyin mid niku
Mekhawan dalih munyai.


TABIKPUN,,
Hyogoken, 24 Maret 2013
Oleh Hendri Semaka.

"Pakhi Dakhak"

Ajo cuba tengis pay
Wayak dalih segata
Lehot jak tamong tumbay
Pakai kham, inday kanca

Say ngukha makkung pandai
Say tuha gulik lupa
ya mula ni tikacai
benni mawat ti hija

Sekiman pakhi dakhak
Awas salah di khetti
Lain ki kalah ungak
Astawa liom hati

Kantu bekhak tengliyak
Khanggal sekula ngaji
Dang cawa mak ti ayak
Nungah goh hulun beji

Ki isi hulu bunjak
Nalom, calaq khik bani
Nganggop mak liyu jak nyak
Lamon say bunjak lagi

Khejeki lagi cakak
Cukup di segala ni
Dang lapah dalih cungak
Kantubang mawat benni

Cuba penyin khik liyak
Sekiman ilmu pakhi
Kasakh sondom ki biyak
Tanda tiyas isi ni

Dang cawa ajo da Nyak
Kantu mawat bukti ni
Ki batang khanggal panjak
Tanda hapa buah ni

Sekiman pakhi dakhak
Lapah pakai puakhi
Bacak kham icak-icak
Hulun kasakh mesikhi

TABIK
Hyogoken, 2 Desember 2013.
Oleh Hendri Semaka..

Mekhanai Bani Kekha

Ajo kutulis kisah
Mekhanai bani kekha
Gaya na'uzubillah
Dandan luar biasa

Ya ngudut khukuk rawit
Baju masuk celana
Jak jawoh pusesuit (cuit-cuit)
Pas khaddik sondom muka (puliom)

Kapan ya di mesigit
Hingga ni alim nana
Injuk bacak ni cekhit
Jak haga kalah gaya

Kapan wat mulli liwat
Lapah mandi wai maja
Nyiwil-nyiwil di jambat
Sambil bukacamata.

Anggop ni paling hebat
Mawat ngedok banding na
Juk bukha kukhang sakhat
Kik nandi culun nana

Sangun Khadu gaya na
Mekhanai  Megegimas.
Liyom kham ngeliak na
Titegokh manas-mana

Haga Khappa Ko Lagi..
Hinno Khadu Tabi'at...
Ibakhat Injuk Bessi...
Khadu Latap Di Kakhat.

Surabaya 10 November 2014
Oleh heri Kusairi