"Bujengan di Khantawan"

Bulayakh jukung lunik
Haga nuju hakhungan
lain ki sangking bangik
Bujengan di khantauwan

Segala ni mak bangik
Sunyin tanggung tenggalan
Wat khisok nahan sakik
Payah ngatukh gajihan

Kok gajih sangun lunik
Bela pakai pemengan
Kippak wat sisa cutik
Pakai mbayakh kontrakan

Khadu pai anak khamik
Sekula ngaji kaban
Kidang haga khappa pik
Hinji khadu bagian

Hinno kisah kham kantik
Sai takhu di khantawan
Dang sangka kutti bangik
Ulih necis pakayan..

Surabaya 17 April 2014
Oleh Heri Al Kusyairi.

"Segaga Mulli Sikop"

Sikop ni muli luppak
Kak duai mandi dibi
Saminggu mak puliak
Ya khadu lom hanipi

Ya handak bottokh pudak
Ketutuk betik hati
Sapa sai tungga mikhak
Haga jadi kundang ni

Khayya munih kinjuk nyak
Mak kalah sahing lawi
Kapan dia kuliak
Mulai nyak pasang aksi

Selekh sayuk ku panjak
Nuju mit dia lawi
Kimut manis ku bukak
Santokh ya hanjak hati

Hani ya cawa di nyak
I Love You abang hani
Ya Alloh mati hanjak
Injuk mak ngilik bumi..

Surabaya 16 April 2014
Oleh Heri Al Kusairi

"Kundang Singut"

Mit di wai mawat mandi
Sabun lebon tehanyut
Malang nasip mu dikhi
Kundang ku ngambakhucut

Induh api ngebani
Lebon moneh kok kimut
Khadu mak waya lagi
Pudak kelom cembetut

Tulung api ubat ni
Kenyin ya moloh kahut
Nyak sayang khadu beni
Nyin dang juk benang kusut

Setahun pitu bulaan
lima belas pukhnama
Badan hampang hayungan
Sakik nihan kukhasa..

Surabaya 16 April 1014
Oleh Heri Al Kusairi

"Gaya ni Mulli Tumbai"

Bucelak Tappal bedak
Gaya ni mulli tumbai
Nyannyah munih tiliak
Gunjukh ni takai-akai

Kok lapah ikak-ikak
Mit dakhak mutil khappai
Businjang munih tukak
Tegakh khabai di ulai

Hampir ya kena paccak
Untung ngusung penyekhai
Ya miccak dalih nyikak
Mati munih ulai sai

Ya handak bottokh pudak
Buok kejung terurai
Sapa kutti sai mikhak
Cuba daftar kutti pai..

Surabaya 15 April 2014
Oleh : Heri Al Kusairi